کرنې وزارت د کلیوالو ښځو د لاسي صنایعو نندارتون پرانیست
د دغه وزارت ویاند اکبر رستمي نن دوشنبه ازادي راډيو ته وویل، دا نندارتون د کلیوالو ښځو د نړیوالې ورځې په مناسبت جوړ شوی دی.
نوموړی وايي، د کرنې او مالدارۍ وزارت یو اساسي پروګرام د کلیوالو ښځو د لاسنیوي لپاره دا دی چې کورنۍ باغچې، د چرګانو ساتلو کوچني فارمونه، شنې خونې او د سبزیو د پروسس مرکزونه جوړ کړي چې په بېلابېلو برخو کې د مېرمنو لپاره اغېزمن دي.
د ښاغلي رستمي په خبره، تېر کال دغه وزارت په لېرې پرتو سیمو کې کلیوالو مېرمنو ته ۱۲۰۰۰ کورنۍ باغچې جوړې کړې وې چې سږکال هم غځېږي.