د پکتیا سوداګر د مڼو ساتلو لپاره سړې خونې غواړي
د پکتیا ولایت د سوداګرۍ او صنایعو خونې مسؤلین وايي، په دې ولایت کې د سړو خونو نه موجودیت د مڼو باغ لرونکي اندېښمن کړي دي.
دوی وايي، همدا شان نورو هېوادونو ته د دې ولایت د مڼو د حاصلاتو صادارتو ته هم زمینه نه ده برابره شوې.
د دغه خونې مسول نصیر عالمیار نن ازادي راډيو ته وویل چې په روان کال کې د دې ولایت د مڼو حاصلات له ۲۰ زره ټنو څخه ۲۵ زره ټنو ته لوړ شوي دي خو د سړو خونو نه موجودیت لامل شوی چې په زیاته اندازه مڼې خرابې او له منځه لاړې شي.
ښاغلي عالمیار وايي، دې مسئلې د یاد ولایت باغ لرونکي اندېښمن کړي او له حکومته غواړي چې حاصلاتو ته يې د بازار موندنې په برخه کې ورسره مرسته وکړي.
نوموړی وايي چې په تېره کې به هر کال له ۱۵ نه تر ۲۰ زره ټنو مڼو پورې پاکستان ته صادریدل خو سږ کال یاد هېواد هم اجازه نه ورکوي چې دغه هېواد ته د مڼو صادارت وشي.
هڅه مو وکړه په دې برخه کې د افغانستان د کرنې او مالدارۍ وزارت نظر هم واخلو خو ونه توانېدو.