دين محمد: د مسکو غونډه د راتلونکې اوونۍ پای ته تر رسېدو مخکې جوړېږي
د افغانستان د سولې عالي شورا وايي چې په مسکو کې د افغانستان د سولې په اړه غونډه د راتلونکې اوونۍ پای ته تر رسېدو مخکې جوړېږي.
د سولې د عالي شورا مرستيال عزيزالله دين محمد نن له ازادي راډيو سره په خبرو کې د دې غونډې د نتايجو په اړه خوشبیني څرګنده کړه.
نوموړی وايي:
"د افغانستان لهخوا د ګډون په اړه تفاهم شوی او افغانستان هم پهدې غونډه کې ګډون کوي. لکه څنګه چې اورو ډېری لوري به پهکې ګډون لري او تمه لرو چې ښه نتايج ترلاسه کړو."
ټاکل شوې وه چې د افغانستان د سولې په اړه د مسکو غونډه د سېپټمبر مياشتې په لومړيو کې جوړه شي خو وروسته ځکه وځنډېده چې افغان حکومت پهکې له ګډونه ډډه وکړه او وې ويل چې د افغانستان د سولې په اړه هره غونډه باید د افغان حکومت په څېښتن توب او مشري جوړه شي.
وروسته کابل او مسکو توافق وکړ چې په ګډه به د دې غونډې د جزئياتو او نوې نېټې په اړه کار وکړي.