په مدیترانې سمندرګي کې د ژغورونکې بېړۍ فعالیت درېږي
د بې پولي ډاکټرانو ادارې او په مدیترانه کې مرستندویه ادارې ويلي، په مدیترانه سمندرګي کې د خپلې ژغورونکې بېړۍ فعالیت دروي.
دغو ادارو د دې پريکړې لامل د اروپايي ټولنې هېوادونو له خوا ورباندې دوامداره فشار بللی دی.
د بې پولي ډاکټرانو ادارې پر ايټاليا او نورو اروپايي هېوادونو تور پورې کړی چې د اکواریوس په نوم د دوی د ژغورونکي بيړۍ د کار مخه نيسي.
په تېر جون مياشت کې اکواریوس وروسته له هغه د سياسي او ډیپلوماټيک بحران یو سمبول وګرځېد چې ايټالیا يې پر مخ خپله پوله وتړله او دا بيړۍ له ۶۳۰ ژغورل شويو پناه غوښتونکو سره په اوبو کې بنده پاتې شوه.