د فرانسې امنیتي ځواکونو د سټراسبورک حمله کوونکی څاري
د فرانسې د امنیتي ځواکونو په سلګونو غړیو د دې هېواد په ختیځه برخه کې پر هغه ۲۹ کلن حملي کوونکي پسي لټون ترسره کړ چې د سټراسبورګ د کرسمس په یوه مشهور مارکیټ کې د ډزو په مهال د الله اکبر چیغې وهلې.
څارنوال ریمي هیټز «Remy Heitz» پرون وویل، د حملې هدف، د هغه لهخوا د عملیاتو بڼې، د هغه سوانح او د پېښې د شاهدانو څرګندونو ته په پام سره چې د هغه د الله اکبر ناره یې اورېدلې، د دغو عملیاتو لپاره یې د ترورېزم ضد پولیس رابللي دي.
په دغه حمله کې چې وړمه ورځ، جرمني سرحد ته نېژدې وشوه، دوه کسان ووژل شول او درېیم هم مغزي فلج شوی دی. ۱۲ تنه نور ټپیان شوي دي.
د فرانسې پولیسو مشکوک حمله کونکی شریف شکات ښودلی او ویلي یې دي چې هغه خطرناک دی او خلکو ته یې خبرداری ورکړی چې په خپله دې د هغه په وړاندې څه نه کوي.
نوموړی له امنیتي ځواکونو سره په ډزو کې پر لاس ټپي شوی او د پېښې له ځایه د ټکسي په ذریعه په تېښتې بریالی شوی دی.
د فرانسې صدراعظم ادوارد فیلیپ وویل چې د ترورېزم ضد ځواکونو له ګزمو سره به چې ډېرې یې په سیمه کې د کرسمس په مارکیټونو کې ځای پرځای شوي، ۱۸۰۰ اضافي سرتېري یوځای شي.