واشنګټن: شمالي کوریا دې د اُټو وارمبیر کورنۍ ته تاوان ورکړي
راپورونه وايي چې د ډسمبر په ۲۴مه نېټه د امریکايي محکمې دا پریکړه تر ډېره سمبولیکه ده، ځکه داسې کوم مکانیزم نهشته چې پیونګ یانګ د دې تاوان ورکولو ته اړ کړي، خو څارونکي وايي، د محکمې دا پریکړه به د ولسمشر ټرمپ هغه هڅې نورې هم پیچلې کړي چې غواړي د امریکا او شمالي کوریا ترمنځ اړیکې بهتره شي.
اُټو وارمبیر د ۲۰۱۶میلادي کال په جنورۍ کې شمالي کوریا ته د یوې ډلې سیاحانو سره د سفر پر مهال نیول شوی و.
نوموړی وروسته له هغې چې له خپل هوټله د یو تبلیغاتي پوسټر په پټولو تورن شو په ۱۵ کاله بند محکوم کړی شو.
نوموړی د ۲۰۱۷میلادي کال په جون کې خوشې او بېرته امریکا ته واستول شو.
خو هغه امریکا ته په ناوړه روغتیايي وضعیت کې ورسېد او تر رسېدو شپږ ورځې وروسته مړ شو.