په درېیو هوايي ډګرونو کې د نشه يي موادو د قاچاق مخه نیول شوې
د افغانستان په درېیو هوايي ډګرونو کې ۱۱ تنه بهر ته د نشه يي موادو د قاچاق په تور ونیول شول.
په هغه خبرپاڼه کې چې د کورنیو چارو وزارت له خوا ازادي راډیو ته لېږل شوې، راغلي چې دا ۱۱ کسان هغه مهال ونیول شول چې په جلا جلا توګه یې پنځه نیم کیلو ګرامه هیروئین د حامد کرزي، بلخ او کندهار هوايي ډګرونو له لارې هند، دُبۍ او ترکیې ته قاچاق کول.
نیول شویو کسانو په خپلو لومړنیو څېړنو کې ویلي چې دا مواد مافیايي ډلو ورکړي او دوی د پیسو په مقابل کې قاچاق کول.