اورزولا فن در لاین د اروپايي کمېسیون د مشرې په توګه تأیید شوه
نوموړې لومړنۍ ښځینه مشره ده چې د اروپايي ټولنې پر دې مهمه څوکۍ ټاکل کېږي.
د سې شنبې په ورځ د ۷۵۱ کسیز اروپايي پارلمان غړیو د جرمنې دې منځلارې ښې اړخې سیاستوالې ته د اروپايي کمېسیون د مشرتابه لپاره ۳۸۳ مثبتې رای ورکړې.
۳۲۷ رای یې مخالفې وې او ۲۲ رای هم ممتنع وې چې پهدې توګه نوموړې د پام وړ مخالفت سربیره پر دې څوکۍ تأیید شوه.
اورزولا فن در لاین چې د جرمني د صدراعظې انګېلا مېرکل نژدې متحده ده، په اروپايي پارلمان کې له دې رای ورکولو وروسته وویل: "هغه باور چې تاسو پر ما وکړ، هغه اعتماد دی چې تاسو یې په اروپا کوئ، ستاسو اعتماد له ختیځه تر لویدیځه او له جنوب تر شمال په یوه متحده او پیاوړې اروپا دی؛ ستاسو اعتماد پر یوې داسې اروپا دی چې د یو بل سره د جنګېدو پرځای د راتلونکي لپاره مبارزه کوي؛ ستاسو اعتماد پر یوې داسې اروپا دی چې زموږ د عصر لویو چېلنجونو ته به اوږه ورکړي. دا ماموریت چې زموږ مخې ته دی ماته عاجزي راکوي، دا لوی مسؤلیت دی او زما کار سره له اوسه پیلېږي."
اورزولا فن در لاین به چې په تېرو شپږو کلونو کې یې د جرمنې د دفاع د وزیرې په توګه هم کار کړی، د ژان کلوډ یونکر ځایناستې وي.
یونکر د روان میلادي کال د نومبر په لومړۍ نېټه د اروپايي کمېسیون د رئیس په توګه خپله دنده پریږدي.