د امریکا د استازو جرګې مشرې د ټرمپ د استیضاح لارو چارو لټولو امر کړی
د امریکا د استازو جرګې او په دې جرګه کې د اکثر ډیموکراتانو مشرې نانسي پلوسي د امریکا متحده ایالتونو د ولسمشر ډونالډ ټرمپ د استیضاح د لارو چارو لټولو امر کړی دی.
پلوسي دا کار وروسته تر هغه کړی چې د اوکرایین له ولسمشر ولادمیر زیلینسکي سره د امریکا د ولسمشر ډونالډ ټرمپ د ټيلیفوني خبرو جزییات افشا شوي.
نانسي پلوسي پرون وویل، ولسمشر باید د خپل عمل پروړاندې مسوول وي او هیڅوک له قانونه پورته نه دی.
هغې وویل د همدې لپاره دې د استازو جرګه د ټرمپ د استیضاح په لارو چارو پلټنه وکړي.
ویل کیږي په هغو ټيلیفوني خبرو کې چې ټرمپ له خپل اوکرایني سیال زیلینسکي سره درلودې، له هغه یې د امریکا د پخواني مرستیال ولسمشر جوبایډن او د هغه د زوی هنتر بایډن په اړه د پلټنو غوښتنه کړې.
د بایډن زوی مخکې په اوکرایین کې رسمي دنده درلوده او یوه قضايي ستونزه ورته پیدا شوې وه.
د ټرمپ په خبره جوبایډن له خپلو وظیفوي صلاحیتونو په استفادې په دې موضوع کې مداخله کړې وه او د خپل زوی سره یې مرسته کړې وه.
تمه کیږي چې جوبایډن په راتلونکو ولسمشریزو ټاکنو کې د ډونالډ ټرمپ اصلي سیال هم وي.