پاکستان کې د تيلو نرخونه بيا پورته شول

د پاکستان وفاقي حکومت یو ځل بیا د تیلو په قیمتونو کې د لیټر پر سر د څلورو روپو اضافه کړې ده.

د خزانې وزارت پرون (د ډېسېمبر پر ۳۱مه) په دغه اړه په یو بیان کې وویل چې د پیټرولیم او هايي سپیډ ډیزلو په قیمتونو کې د څلورو روپو د اضافې فیصله به سر له ننه (جنورۍ ۱) عملي کیږي.


په بیان کې راغلي دي چې وزیراعظم عمران خان په دغه اړه په یوه غونډه کې د تیلو او ګیسو د انتظام ادارې (اوګرا) دا تجویز مسترد کړی چې د پټرولیم مصنوعاتو نرخونه دې لوړ کړل شي او د دغه پر ځای، د لیټر پر سر د څلورو روپو د اضافې پرېکړه وشوه. د خزانې وزارت په وینا دا هر څه د پیسو د نړیوال صندوق (ای اېم اېف) سره د مالي ژمنو پوره کولو لپاره کوي.




له حکومتي پرېکړې وروسته د یو لیټر پر سر د پټرولیم قیمت ۱۴۴ اعشاريه ۸۲ او د هايي سپیډ ډیزلو قیمت ۱۴۱ اعشاريه ۶۲ روپیو ته پورته شوی دی.


دا په داسې حال کې ده چې په پاکستان کې ولس له وړاندې د توکیو له لوړو بیو سر ټکوي او د حکومت مخالفو سیاسي ګوندونو لخوا وخت په وخت د ګرانۍ پر ضد احتجاجي مظاهرې هم شوې دي.


د پاکستان د مالیې وفاقي وزیر شوکت ترین د ډېسېمبر پر ۳۰مه په اسلام اباد کې یوې خبري غونډې ته د وینا پر مهال وویل، د پیسو له نړیوال صندوق (ای اېم اېف) څخه د پور د دوام لپاره اړینه وه چې پر ګاډو، موبایل ټېلېفونونو، کمپیوټرونو او ځینو نورو شیانو مالیې ولګوي او یا ورباندې ټېکسونه زیات کړي.




اقتصادي شنونکي وايي، چې کله هم په ملک کې تېل ګران شي او یا هم حکومت اضافي ټېکسونه ولګوي نو د ورځني ژوند د استعمال توکي ورسره ګرانېږي او پر ولس یې فشار زیاتېږي.


په ملک کې د ګرانۍ خلاف عامو خلکو او سیاسي ګوندونو وخت پر وخت مظاهرې هم کړې دي او د عمران خان په مشرۍ کې يې پر واکمن ګوند پاکستان تحریک انصاف نیوکې کړې او وايي، په پاکستان کې پخوا دومره ګراني چا نه وه لیدلې.


خو وزیراعظم عمران خان، د ډېسېمبر پر ۱۱مه د پنجاب په میانوالي کې جلسې ته ویلي وو، په پاکستان کې اوس هم د نړۍ د نورو هېوادونو پرتله ګراني کمه ده. نوموړي هغه مهال دا هم ویلي وو چې حکومت د ګرانۍ قابو کولو لپاره اقدامات پیل کړي دي او ډېر ژر به د شیانو نرخونه کم شي.