د روغتیا سازمان: په افغانستان کې مو د کوویډ-۱۹ لابراتورونو ته وسایل رسولي
د روغتیا د نړیوال سازمان د افغانستان دفتر نن چهارشنبې(د مرغومې په ۱۵مه) پر خپل ټویټر ویلي چې په ټول افغانستان کې یې د دې سازمان ملاتړ لرونکو د کوویډ-۱۹ څلوېښت لابراتورونو ته ضروري تجهیزات سپارلي دي.
د روغتیا نړیوال سازمان وايي دا لابراتورونه دا مهال کولای شي چې په ورځ کې له نهه نیمو زرو زیات د کوویډ- ۱۹ معاینات ترسره کړي.
دا اقدام داسې مهال کیږي چې روغتیايي ادارو په افغانستان کې په روغتونونو کې د کوویډ- ۱۹ ناروغۍ د معایناتو او درملنې لپاره د امکاناتو د سخت کمښت خبرداری ورکړی.
له بلې خوا ویره ده، افغانستان چې خلک یې دا مهال له سخت اقتصادي بحران سره مخ دي، د کرونا ناروغۍ نوې بڼه اومیکرون ښايي په کې په چټکۍ خپره او ګڼ کسان پرې اخته شي.