د اختر په ورځو کې د تلیفوني شبکو ناسم فعالیت او د خلکو ستونزې
یو شمېر کابل ښاریان شکایت کوي چې د اختر په لومړۍ ورځ د سهار له پیله تر غرمې ټلیفوني انتنونه پرې بند او له هر ډول ټلیفوني اړیکو راګرځول شوي وو.
دوی د دوشنبې په ورځ د (مارچ په ۳۱مه) ازادي راډیو سره خبرو کې وویل چې که څه هم د طالبانو حکومت ورته د دې اقدام دلیل د امنیت د ټینګښت ښودلی، خو دوی د بدیلو لارو غوښتونکي دي.
د کابل د کارته چهار سیمې یو اوسېدونکي ځدران وویل:
“که څوک امنیتي ستونزو د رامنځته کولو اراده ولري نو هغو خو د سټلایت او مخابرې په وسیله یې هم رامنځته کولای شي، نو (د شبکو پرې کول) سمه لاره نه ده، بلکې باید د جوماتونو او د خلکو د (راټولېدو) نورو ځایونو کې باید امنیتي ځواکونه زیات ودرول شي، تلاشۍ وشي، باید نورې بدیلې لارې ولټول شي.”
د کابل ښار د ده سبز ولسوالۍ یو اوسېدونکی صمیم هم ورته شکایت لري:
“د اختر په شپه یې اعلان ورکړی وه چې اترا ادارې لخوا به په ټول افغانستان کې د امنیتي ستونزو له امله د سهار له شپږو د غرمې تر ۱۱ بجو مخابراتي شبکې بندې وي، نو خلک یې له ستونزو سره مخ کړل، خلک اړ دي چې خپلو کورنیو خبرې وکړي همدا یوه د اختر ورځې خوشحالي لرو، خو د اختر په اوله ورځ خلک له دې امله له ستونزو سره مخ او پرېشانه شول.”
خو د کابل ښار لودیځ کې دشت برچي سیمه کې خلک بیا وایي د ټلیفونونو د انتنونو پرې کېدل نه یوازې اختر بلکې په خبره یې اکثرو مذهبي او نورو مناسبتي ورځو کې هم رامنځته کیږي.
د دشت برچي سیمې اوسېدونکي محمد ازادي راډیو ته وویل:
“دا شبکې په عاشورا او نورو مناسبتي ورځو کې هم پرې وي، خلک له ستونزو مخ کېږي ځکه ټول ارتباطات پرې کېږي، د عاشورا ورځو کې خو حتا د مازدیګر تر درې څلورو بجو قطع وي.”
دوی وایي ډیری هغو خلک چې ناروغان یا ورته نورې جدي ستونزو لري، د دې مخابراتي شبکو پرې کول یې ننګونې اضافه کوي.
دا کابل ښاریان داسې وخت د ستونزو شکایتونه کوي چې له دې مخکې اخترونو، د عاشورا ورځو او ګڼو نورو مناسبتي ورځو پر ترڅو کې هم د ټلیفونونو د انتنونو د پرې کېدو له امله ورته اندېښنې مطرح شوي دي.
که څه هم د طالبانو د حکومت د مخابراتو او ټکنالوژۍ وزارت په دې اړه رسما څه نه دي ويلي او نه د طالبانو د حکومت د کورنیو چارو وزارت او امنیه قوماندانې په دې اړه د ازادي راډیو پوښتنې ځواب کړې، خو خلک وایي د امنیت د ساتلو لپاره باید په نورو بدیلو لارو چارو غور وشي.
دا اقدامات وروسته هغه کېږي چې په ۲۰۲۱ کال کې پر افغانستان د طالبانو له بیا واکمنېدو سره، د دوی ګڼو چارواکو په پرلپسې توګه په ټول هېواد کې د بشپړ امنیت د ټینګښت ادعاوې کوي.