Rritet në 63 numri i të vdekurve nga zjarri në një ndërtesë në Johanesburg

Është rritur në 63 numri i të vdekurve nga zjarri në një ndërtesë shumëkatëshe të enjten në Johanesburg, qytetin më të madh të Afrikës Jugore, njoftuan autoritetet.

Shërbimi Emergjent i Johanesburgut tha se mbi 40 persona të tjerë u lënduan nga zjarri, i cili shpërtheu në orët e hershme të 31 gushtit.

“Tani i kemi 63 të vdekur dhe 43 të lënduar, të cilën janë dërguar në qendra të ndryshme spitalore”, tha zëdhënësi i Shërbimit Emergjent, Robert Mulaudzi.

Mulaudzi tha se zjarri është shuar tashmë, dhe se operacioni i kërkimit është duke u zhvilluar në ndërtesën e nxirë në qendër të Johanesburgut.

Në mesin e viktimave është edhe një fëmijë, theksoi ai.

“Po shkojmë nga kati në kat për t’i tërhequr trupat. Kjo është një ditë e trishtueshme për qytetin e Johanesburgut. Unë kurrë nuk kam parë diçka të tillë gjatë 20 vjetëve në shërbim”, theksoi Mulaudzi.

Ende nuk është e qartë se çfarë e ka shkaktuar zjarrin, ndërkohë që ndërtesa është evokuar plotësisht tashmë.

Mulaudzi theksoi se ndërtesa ishte “një vendbanim joformal” ku njerëzit e pastrehë ishin vendosur në kërkim të akomodimit pa ndonjë marrëveshje kontrate formale. Sipas tij, kjo e ka bërë të vështirë kërkimin e njerëzve në ndërtesë.

Në ndërtesë mund të kenë qenë duke jetuar rreth 200 njerëz, sipas dëshmitarëve.

Uzurpimi i jashtëligjshëm i ndërtesave të papërdorura në qendër të qytetit është i madh, dhe thuhet se shumë prej tyre janë nën kontrollin e sindikatave kriminale të cilët marrin qira nga banuesit.

Në qershor, zjarri në një ndërtesë të vjetruar në Johanesburg i vrau dy fëmijë nën moshën 10-vjeçare, të cilët kishin mbetur të ngujuar në një banesë.