Наргиси танфурӯш барои таҳдиди фош кардани акси муштариаш кушта шуд
Додгоҳе дар вилояти Маскав ду марди тоҷики муттаҳам дар куштори як зани фоҳишаро ба 7 ва 8 соли зиндон маҳкум кард. Ношири ин хабар вебсайти «Московский Комсомолец» рӯзи 7 июн навишт, Наргиси 20-сола аз Тоҷикистон ки дар Русия аз роҳи танфурӯшӣ пул ба даст меовард, барои шантаж ё таҳдиди фош кардани аксҳои маҳрамонаи марди тоҷике бо номи Ҷаҳонгир кушта шудааст. Нашрия бар асоси хулосаи додгоҳ мегӯяд, Ҷаҳонгир дар вилояти Маскав таксиронӣ мекард ва бо Наргис робитаҳои ошиқона барпо кард.
Додгоҳ гуфт, ки Наргис Ҷаҳонгирро таҳдид кардааст, ки агар робитаи ошиқонаашро бо ӯро қатъ кунад, аксҳои маҳрамонаашро аз телефони худ ба ҳамсару аҳли хонаводаи Ҷаҳонгир ирсол мекунад. Дар натиҷа, Ҷаҳонгир аз Ҷасур ном як тоҷики дигаре хоҳиш мекунад, ки нақшаи куштори духтарро иҷро кунад. Ҷасур баъди алоқаи ҷинсӣ бо Наргис ӯро бо истифода аз латтае буғӣ карда мекушад. Дар хабар таърихи содир шудани ҳукм ва қатли духтари тоҷик нашр намешавад.
Танфурӯшӣ дар Русияро бархе духтарони тоҷики мӯҳтоҷи кор ба манбаи даромад табдил додаанд. Гоҳо полиси ин кишвар хабарҳои ошкор шудани фоҳишахонаҳои махфиро ҳам нашр мекунад, ки дар он дар баробари дигари занони сокини кишварҳои Осиёи Марказӣ, тоҷикон ҳам кор мекунанд.
Дар Тоҷикистон барои танфурӯшӣ ҷазои маъмурӣ ва ҷарима пешбинӣ шудааст. Дар Тоҷикистон барои танфурӯшӣ ҷазои маъмурӣ ва ҷарима пешбинӣ шудааст. Вазири умури дохилии Тоҷикистон Рамазон Раҳимзода гуфт, ки дар Тоҷикистон дар соли 2016 - 1991 зани танфурӯш ба қайд гирифта шуд, ки 9 нафари онҳо то 18-сола буданд. Дар ҳамон сол 288 фоҳишахона дар ҳудуди Тоҷикистон ошкор шудааст.
Бархе аз занон, ки дар Русия бо танфурӯшӣ даромад ба даст меоранд, мегӯянд, ба хотирӣ дурӣ аз ватан ва ҳам ба хотири пули беҳтар ба ин кишвар барои кор мераванд.