Як зани саудӣ худро дар меҳмонхонаи Тайланд бандӣ кардааст
Як зани 18-сола аз Арабистони Саудӣ худро дар меҳмонхонаи фурӯдгоҳи Бангкок, пойтахти Тайланд бандӣ карда, аз ҷабри хонаводааш шикоят дорад ва аз Австралия паноҳандагӣ мехоҳад.
Раҳаф Муҳаммад Алкунун рӯзи 5 январ дар ҳоле ба пахши паёмҳои кумакхоҳӣ дар Твиттер оғоз кард, ки баъди расиданаш аз Кувайт ба Банкок шиносномаашро масодира карданд.
Алкунун аз Идораи Созмони Милали Муттаҳид дар умури паноҳандагон ва ҳар нафари дигар, ки метавонад ба ӯ дасти кӯмак дароз кунад, ёрӣ пурсидааст.
Вакили ӯ рӯзи 7 январ гуфт, ки дархости ҷилавгирӣ аз депортатсияи Алкунун ба Додгоҳи Ҷиноии Бангкок фиристода шуд.
Идораи Созмони Милали Муттаҳид дар умури паноҳандагон низ дар як изҳорот гуфт, ки барои дастрасӣ ба мақомоти Тайланд, мулоқот бо худи Раҳаф Алкунун ва ниёзи ӯ барои ҳимояи байналмилалӣ талош доранд.
Алкунун дар Твиттер навишт, ки агар мақомоти Арабистони Саудӣ ӯро иҷборан ба хонаводааш баргардонанд, ҳаёташ ба "хатари ҷиддӣ" рӯ ба рӯ мешавад. Ӯ дар сӯҳбат бо матбуот гуфтааст, ки эҳтимол кушта шавад.
Раҳаф Алкунун мегӯяд, ки аз зуроварӣ дар хонаводааш, бо шумули латтукӯб ва таҳдиди марг аз ҷониби мардҳои хонавода фирор кард. Ин зани саудӣ мегӯяд, вақте мӯи худро кӯтоҳ кард, хонаводааш ӯро ба муддати шаш моҳ дар як утоқ зиндонӣ карданд.
Арабистони Саудӣ ба мардҳои хонавода ҳақ медиҳад, ки аз занҳо, ҳатто агар болиғ бошанд, сарпарастӣ кунанд ва фирори занҳо аз хона масъалаи маргу зиндагиро ба миён меорад.