Амрико аз шаҳрвандонаш хост, ба сабаби COVID-19 ба Тоҷикистон нараванд
Вазорати умури хориҷии Амрико ба шаҳрвандони ин кишвар ҳушдор додааст, ки ба сабаби эҳтимоли сирояти коронавируси нав ба Тоҷикистон сафар накунанд ва айни замон бинобар эҳтимоли хатари терроризм эҳтиёкор бошанд.
Дар ҳушдори тозаи вазорат аз рӯзи 6-уми сентябр омадааст: “Ба сабаби COVID-19 ба Тоҷикистон сафар накунед. Ҳангоми ҳузур дар Тоҷикистон ба сабаби терроризм бисёр эҳтиёткор бошед.”
Яке аз сабабҳои чунин ҳушдори вазорати умури хориҷии Амрико, ки умдатан дар сурати хатарҳои ҷиддӣ ба ҷони шаҳрвандон содир мешавад, тавсияи Маркази Назорат ва Пешгирӣ аз Бемориҳо дар Амрико аст, ки рӯзи 6-уми август Тоҷикистонро ба қатори кишварҳое ворид кардааст, ки хатари сирояти бемории COVID-19 дар онҷо баланд аст.
Дар шарҳи расмии марказ, ки дар вебсайти он нашр шудааст, омадааст, ки “Хатари сирояти COVID-19 дар Тоҷикистон баланд аст. Марказ ба мусофирон тавсия медиҳад, ки аз тамоми сафарҳои нозарур ба Тоҷикистон худдорӣ кунанд”. Сафарҳои зарурӣ ба гуфтаи марказ, кор барои расонидани кумакҳои башарӣ, ба сабабҳои сиҳатӣ ва ё мушкилоти ҳалталаби оилавӣ аст.
Дар шарҳи марказ ҳамчунин омадааст: “Агар шумо дар Тоҷикистон бемор шавед ва ба кумаки тиббӣ эҳтиёҷ пайдо кунед, имконот маҳдуд аст. Мусофироне, ки ба Тоҷикистон мераванд, мумкин аст, ба сабаби COVID-19 ба карантини ҳатмӣ гирифта шаванд, марзу фурудгоҳҳоро баста бинанд, дастур бигиранд, ки дар хона монанд. Дастрасӣ ба табобат мумкин аст, маҳдуд бошад.”
Дар идомаи шарҳи Маркази Назорат ва Пешгирӣ аз Бемориҳо дар Амрико омадааст: “Одамони калонсол, афроди синну соли гуногун, ки бемориҳои хосе доранд ва дигар касоне, ки мумкин аст, ба хатари зиёди бемории сахт рӯ ба рӯ шаванд, бояд сафари худ, аз ҷумла сафарҳои зарурии худро ба Тоҷикистон ба таъхир андозанд.” Тоҷикистон то рӯзи 5-уми сентябр дар қатори кишварҳое буд, ки ба гуфтаи марказ мусофирон ҳангоми сафар ба он бояд қоидаҳои маъмулии пешгирӣ аз сирояти ҳаргуна беморӣ ва ё чунин меъёрҳоро “сахт риоят мекарданд.“
Бино ба омори вазорати тандурустии Тоҷикистон, то кунун дар кишвар бештар аз 8750 нафар ба бемории COVID-19 гирифтор шуда ва 70 нафар фавтидаанд. Аммо мутахассисон ба омори расмӣ шубҳа доранд ва мегӯянд, ки миқёси сирояти беморӣ ва талафот зиёдтар аз он аст, ки мақомот нишон медиҳанд.
Дар Тоҷикистон, ки баъд аз моҳи апрел, рӯзона доир ба 200 мавриди сироят ва ё бештар аз он ҳам гузориш медоданд, ҳоло аз 30 то 40 мавриди сирояти COVID-19 гузориш медиҳанд. Аммо бино ба гузоришҳои ғайрирасмӣ, теъдоди мубталоён баъди оғози соли нави таҳсил дар моҳи август, зиёдтар шудааст. Чанде пеш яке аз таваллудхонаҳои вилояти Суғдро ба сабаби сирояти беморӣ ба ду зан таҳти карантин қарор доданд.
Вазорати умури хориҷии Амрико дар робита ба эҳтиёткории хос аз терроризм дар Тоҷикистон гуфтааст: “Террористон дучархасаворонро ҳадаф гирифтанд ва мумкин аст, дигар ҷойҳо, ба мисли маҳаллаҳои аҳолинишин, клубу ресторанҳо, ибодатгоҳу, меҳмонхонаҳо, мактабу маконҳои истироҳатӣ ва дигар ҷойҳоро ҳадаф бигиранд.” Ҳарчанд ба гуфтаи вазорат, “муассисаҳои ҳукумати Тоҷикистон ҳадафи аслии террористон мемонанд.”
Манзур аз ҳамла ба дучархасаворон ҳамлаи 29-уми июли соли 2018 ба гуруҳе аз дучархасаворони хориҷӣ аст, ки дар натиҷаи он чаҳор хориҷӣ аз ҷумла ду шаҳрванди Амрико кушта шуд. Масъулияти ҳамларо гуруҳи ба ном “Давлати исломӣ” бар дӯш гирифт.