Новости за 14.10.2022

Төмән татарларының «Яңарыш» сайтында Диләфрүз Фәхретдинованың  «Иҗатка илһам өстәүче китапханәче» дигән язмасы чыкты.

22 октябрь көнне Самара өлкәсенең Управленческий бистәсе «Чайка» мәдәният сараенда «Ялкынлы яшьлек» татар халык ансамбле яңа программа тәкъдим итә.

Түбән Камада Россия Мәгариф министрлыгы ярдәме белән, «Мәктәп классикасы» федераль проектының беренче этабы эшли башлады. Аның бурычы – илдә мәктәп театрларын үстерү. «Созвездие-Йолдызлык» Арт-резиденциясе мәктәп театрлары системасын эшләү эшенә кушылды. Бу турыда Түбән Кама муниципаль районы рәсми сайтында хәбәр ителә.

Зәйдә беренче медицина ярдәме күрсәтү һәм тактик әзерлек буенча курслар башланды.Төрле вазгыятьләрдә үз-үзләрен дөрес тотарга өйрәнергә теләүчеләргә Антон Миронов, Ринат Хөснетдинов һәм Денис Ермолаев күнекмәләр үткәрәчәк.

Азнакай районының Чубар-Абдул мәдәният йортында оекбаш, бияләй һәм муенса бәйләр өчен җепләр әзерләү бара. Мобилизацияләнгән ир-атларга ярдәм итү ниятеннән башланган бу изге эштән, Чубар-Абдул авылы халкы да читтә калмады. Бу турыда «Маяк» сайтында хәбәр ителә.

Чистайдан килгән кунаклар Кукмара халкының һөнәрле булуына сокланды. Делегация составында аккалфаклылар да бар иде. Аларның максаты – мәчет һәм мәдрәсәләрнең эше, «Ак калфак» оешмасы һәм аларның музей, мәктәпләр, балалар бакчалары, мәдәният йортлары белән элемтәләренә күзәтү ясау, тәҗрибә уртаклашу. Бу хакта «Хезмәт даны» сайтында хәбәр ителә.

Әгерҗе районыннан өлешчә мобилизация буенча чакырылган ир-ат мәктәп укучыларына язган җылы хатлары өчен рәхмәт белдерде. Бу турыда «Әгерҗе хәбәрләре» яза.

Быел Казанда Хәтер көне булмый. Хакимият рөхсәт итми. Путин урнаштырган авторитар режимда матәм чарасына урын юк. Еллар дәвамында Хәтер көне карт-коры җыела торган чара дигән фикер таралган вакытта, яшь буын вәкилләре, галимнәр бик тиздән Хәтер көне татарларны берләштерү чарасына әверелә дип әйтә.