Новости за 14.04.2023

«Өмет» газетасында Ульяновск өлкәсенең Димитровград шәһәре Габдулла Тукай исемендәге 22 нче мәктәбенең ана теле укытучысы Гүзәл Сәмигуллинаның «Спас өязе тарихының алтын битләре» дигән язмасы чыкты.

Чүпрәледән мобилизацияләнгән ир-егетләр, ике атналык ялдан соң, янә махсус операция зонасына китте. Хәрбиләрне озату чарасы Петр Дементьев исемендәге паркта булды.

Агымдагы елда Апас районында 5 гаилә «Татарстан Республикасында яшь гаиләләрне торак белән тәэмин итү» программасы нигезендә торак сатып алуга яки төзүгә социаль түләү алу мөмкинлеге бирүче сертификатка ия булды. Яшь гаиләләргә сертификатларны тантаналы төстә Татарстан Республикасының яшьләр эшләре министры Ринат Садыйков белән район башлыгы Айрат Җиһаншин тапшырды.

Әлмәттә 12 апрельдә «Беренчеләр хәрәкәте» балалар-яшүсмерләр оешмасын ачу тантанасы булды. Анда 7-18 яшьлек балалар һәм яшүсмерләр катнаша ала. 26 яшь әлмәтле инде хәрәкәттә.

Бөгелмәнең «Хәтер» хәрби дан залында 14 яшькә җиткән укучыларга паспорт тапшыру тантанасы булды. Тантанага 13 укучы чакырылган. Алар – уку отличнигы, конкурсларда, олимпиадаларда, спорт ярышларында җиңүчеләр, сыйныфның һәм мәктәпнең иҗтимагый тормышында актив катнашучылар.

Татарстан Югары мәхкәмәсе Казанның 175нче гимназиясендә атыш оештыруда гаепләнгән Илназ Галәвиевне гомерлеккә ирегеннән мәхрүм итте. Ата-аналар моны югары җәза икәнен аңлый, әмма авыр карарны авыр кабул итә.  Кичә Казанда Татарстан Югары мәхкәмәсендә 9 кешене атып үтергән Илназ Галәвиевка җәза карары чыгарылды. Ул күп кешене үтерүдә, шартлаткыч ясау һәм куллануда, мәктәп милкен зарарлауда гаепле дип табылды һәм гомерлеккә иректән мәхрүм ителде. Гомерлек зинданнан тыш, Галәвиевкә 200 мең сум штраф бирелде. Читать дальше...

Түбән Камада яшәүчеләр Кызыл Чишмә бистәсенең урман-парк зонасында «Урман әкиятләре – урманны саклауда дендрограффити» проекты кысаларында агачларны файдалы рәсемнәр белән бизи. Алар имәннең ачык ярыкларында урман флорасы һәм фаунасы сурәтләрен ясый.