Түбән Камада экологик иминлеккә багышланган аерым сәхифә булдыру планлаштырыла
(Казан, 29 август, «Татар-информ»). Түбән Камада Иҗтимагый совет әйләнә-тирә мохитне саклауга багышланган утырыш уздырды. Очрашуда шулай ук хакимият, сәнәгать предприятиеләре вәкилләре, эковолонтерлар һәм массакүләм мәгълүмат чаралары вәкилләре катнашты. Түбән Кама өчен бу тема һәрвакыт актуаль булып калачак.
Бүгенге көндә суның сыйфаты буенча мөрәҗәгатьләр саны шактый кимегән. Су барлык стандартларга да туры килә. Суның сыйфатын лаборатория күзәтеп тора. Белгечләр 77 күрсәткеч буенча тикшерәләр. Бу турыда Түбән Кама муниципаль районы сайты нда хәбәр ителә.
«Түбән Кама Нефтехим» тәҗрибәсе ярдәмендә шәһәр һәм районның җиде чишмәсендә төрле катнашмалар булу-булмауга тикшерү уздырылды. Аларның икесендә генә тозларның артуын ачыклаганнар.
Экологик агарту, тәрбия һәм халыкка мәгълүмат бирү эшчәнлекнең иң мөһим юнәлешләренең берсе булып тора. Бу эшнең төп максаты — экологик культура формалаштыру. Түбән Камада «Экомир» коммерцияле булмаган оешмасы эшли, ул чүп-чарны аерым җыюда махсуслаша.
Предприятиеләрнең «ябык» булуы шәһәр һәм район халкы тарафыннан тискәре күренеш тудыра, дип саный Ленар Әхмәтов. Бу темага җәмәгатьчелек һәм массакүләм мәгълүмат чаралары белән элемтә бүлеге җитәкчесе Яна Енькова чыгыш ясады.
Җитәкче «Вконтакте» һәм «Инстаграм» социаль челтәрләрендә экологик куркынычсызлык буенча махсус сәхифә булдыруны оештырырга һәм аңа җаваплы итеп, экология бүлеге белгечен беркетергә тәкъдим итте.
«Социаль челтәрләрдә актив эш алып барылуын һәм үз сорауларына җавапларны күргәч, халык, проблемалар турында хәбәр итү юлын кыскартып, турыдан-туры бүлек вәкилләренә мөрәҗәгать итәчәк», — ди Яна Енькова.
Бу хакта тулырак:
http s://tat.e-nkama.ru/news/751/100205/
© Түбән Кама муниципаль районы рәсми сайты