(Казан, 17 ноябрь, «Татар-информ»). Саратовның Ислам комплексында беренче тапкыр онлайн-экскурсия узды. Экскурсия Zoom платформасында Чернышевский исемендәге Саратов дәүләт университеты һәм Гагарин исемендәге Саратов дәүләт техник университеты чит ил студентлары өчен оештырылды. Россия Мөфтиләр шурасы сайтында хәбәр ителгәнчә, чара әлеге югары уку йортлары җитәкчеләре инициативасы белән оештырылган. 2021 елның 11 ноябрендә Саратовның ислам комплексы буенча онлайн-экскурсияне «Яңарыш» мәдәни-агарту оешмасы җитәкчесе Рөстәм хаҗи Әбделманов үткәрде. Ул шулай ук Саратов Җәмигъ мәчете тарихы, аның интерьеры һәм экстерьерының үзенчәлекләре, мөселман дин йолаларының ничек башкарылуы турында сөйләде. Моннан тыш, чит ил студентлары Саратов өлкәсе мөселманнары Диния нәзарәте һәм аның структур бүлекчәләре эшчәнлеге турында белде, «Шәех Сәид» мәдрәсәсе, «Зәйд бин Сабит» Коръән үзәге һәм «Мәктәп» якшәмбе мәктәбе дәресләре уза торган уку сыйныфларын күрде. «Экскурсия барышында чит ил студентлары сораулар бирә һәм ислам традицияләре турында күбрәк белә алды», - диде хаҗи Әбделманов. Онлайн-экскурсия кысаларында Саратов Җәмигъ мәчете каршындагы якшәмбе мәктәбе укытучысы, Саратов дәүләт техник университеты халыкара коммуникацияләр идарәсе хезмәткәре Алексей Моратов мондый чараларның мөһимлеген билгеләп үтте. Саратовның Ислам комплексында туристлар, мәктәп укучылары һәм студентлар төркеме экскурсияләре даими була.
