(Казан, 20 ноябрь, «Татар-информ»). Казан «Ислам хезмәттәшлек оешмасының Яшьләр башкаласы — 2022» статусына ия булды. Шул хактагы карар Ислам хезмәттәшлек оешмасы яшьләр форумының идарә утырышында кабул ителде, диде Татарстан Президенты Рөстәм Миңнеханов ТР Хөкүмәте йортында узган киңәшмәдә. Ул искәртеп үткәнчә, әлеге статуска Истанбул (Төркия), Шираз (Иран), Путраджая (Малайзия), Фес (Марокко), Доха (Катар) һ.б. шәһәрләр лаек булган инде. «Идел буе Болгар дәүләтендә ислам динен кабул итүнең 1100 еллыгын бәйрәм итәр алдыннан бу вакыйга символик мәгънәгә ия. „Ислам хезмәттәшлек оешмасының Яшьләр башкаласы“ дигән статусны зур әзерлек эшләре үткәрү нәтиҗәсендә алдык. Татарстан инде күп еллар дәвамында үз территориясендә яшьләр катнашында үтә торган зур халыкара чаралар кабул итә», — дип искәртте ТР Президенты. Аның сүзләренчә, киләсе елда Казан яңа статуста Глобаль яшьләр саммиты (анда Ислам хезмәттәшлек оешмасы илләренең яшьләр эшләре министрлары катнашачак), Халыкара яшьләр мөселман мәдәнияте фестивале, халыкара ат чабышлары һ.б. чараларны кабул итәчәк. Сүзенең ахырында Рөстәм Миңнеханов ТР Яшьләр эшләре министрлыгына вакыйгаларның йомгаклау планын әзерләргә, шулай ук оештыру комитеты буенча тәкъдимнәр кертергә һәм тиешле ведомствоара эш оештырырга йөкләмә бирде.
