Татарстанда илдәге ирекле складларның иң беренчесен эшләтеп җибәрергә мөмкиннәр
Дәүләт Думасы «Таможня җайга салу турында» законга төзәтмәләр кабул итте. Үзгәртелгән канун Россиядә бонд (ирекле) складлары (чит ил товарын таможня процедураларын үтмичә һәм салым түләмичә генә озак сакларга мөмкин булган мәйданчыклар) ачу буенча эксперимент башларга мөмкинлек бирә. Мондый складларның берсе Татарстанда барлыкка килергә мөмкин.
«Без Россиядәге беренче бонд складларының берсе тиздән Татарстанда оештырылыр дип өметләнәбез. Моның өчен без зур күләмдә әзерлек эшләре башкардык», – дип сөйләде Татарстан Президенты каршындагы Эшмәкәрләр хокукларын яклау буенча вәкаләтле вәкил, Татарстан Республикасы Президенты ярдәмчесе Фәрит Габделганиев.
Ул билгеләп үткәнчә, мондый проектны раслау теләк-тәкъдиме белән Татарстан чыкты. 2020 елның июль ахырында республика Президенты Рөстәм Миңнеханов Россия Премьер-министры Михаил Мишустинга Татарстан Республикасының Россиядә беренче бонд склады төзү экспериментында катнашырга әзер булуы турында мөрәҗәгать юллаган.
Мондый складлар булдыру чит илдән кертелә торган товарларны урнаштыру һәм аларны таможняда рәсмиләштерүне интернет-кибетләрдә саткан вакытта гына үткәрергә мөмкинлек бирәчәк.