Төнлә авыл урамыннан барганда алты үсмер утырган машина авариягә очраган, берсе үлгән
Узган төндә Башкортстанның Белорет районында 6 үсмер утырган машина авариягә очраган, берсе һәлак булган. Җинаять эше ачылган, тикшерү бара. Бу турыда «Башинформ» хәбәр итте.
23 мартка каршы төндә Белорет районының Тирлән авылында «ВАЗ-2120» һәм аның белән бер үк якка бара торган «УАЗ» бәрелешә. «ВАЗ» машинасының 17 яшьлек йөртүчесе урында ук һәлак була. Тагын 5 үсмергә – 14 яшьлек өч кызга, 16 һәм 17 яшьлек ике малайга медицина ярдәме кирәк була. Аларны хастаханәгә китерәләр.
«УАЗ» машинасы белән идарә итүче 28 яшьлек ир-ат имгәнмәгән, ул аек була. «УАЗ» машинасы тиешенчә теркәлмәгән, хуҗасы җаваплылыкка тартылачак.
Полиция ачыклаганча, мәрхүм үсмернең машина йөртү таныклыгы юк. Атасы сүзләренчә, ул машинаны сорамыйча гына алып чыгып киткән, диелә хәбәрдә.