2012-2017թթ. «խուսափողները՚ Հայաստանի բյուջեն համալրել են 4 մլրդ դրամով
Արմինֆո.2012-2017թթ. Զինված ուժերում ծառայությունից «խուսափածները՚ Հայաստանի բյուջեն համալրել են 4 մլրդ դրամով:
Օրերս խորհրդարանը փոփոխություններ կատարեց «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում, ըստ որի, յուրաքանչյուր բաց թողած զորակոչի համար արտերկրում գտնվող 27 տարին լրացած քաղաքացին կարող է վճարել 200 հազար դրամ և վերադառնալ Հայաստան` ազատվելով քրեական պատասխանատվությունից: Այս գումարի չափը փոփոխություններով բարձրացվեց կրկնակի անգամ. նախորդ օրենքով 100 հազար դրամ էր: Ենթադրվում է, որ օրենքը գործելու է մինչև 2019 թվականի դեկտեմբերի 31-ը:
Lragir.am-ը Պաշտպանության նախարարություն հարցում է ուղարկել՝ պարզելու, թե վերջին 5 տարիներին քանի մարդ է օգտվել օրենքի այս հնարավորությունից ու վերադարձել Հայաստան, և որքան է կազմել վճարված գումարը: ՊՆ-ից տրամադրել են 2012-2017 թվականների ցուցանիշները, որոնցից պարզ է դառնում, որ դիմած քաղաքացիների դիվը գնալով նվազում է: Մասնավորապես, 2012 թվականին օրենքի շրջանակներում դիմած և վերադարձած քաղաքացիների թիվը կազմել է 797, նրանց կողմից վճարվել է 1 մլրդ 047 մլն 180 հազար դրամ: 2013 թվականին դիմածների թիվը կազմել է 604, նրանցից գանձվել է 801 մլն 230 հազար դրամ: 2014 թվականին դիմած անձանց դիվը կազմել է 672, վճարվել է 912 մլն 570 հազար դրամ: 2015 թվականին դիմել է 642 մարդ, վճարվել է 817 մլն 770 հազար դրամ: 2016 թվականին օրենքից օգտվողների թիվը կտրուկ նվազել է՝ կազմելով 264 մարդ, նրանց կողմից վճարվել է 344 մլն 300 հազար դրամ: Այս տարվա ցուցանիշները հետևյալն են՝ մինչև սեպտեմբերի 15-ը ներառյալ օրենքի ընձեռած հնարավորությունից օգտվել է 231 քաղաքացի՝ վճարելով 305 մլն 780 հազար դրամ: