Զարուհի Փոստանջյանը և նրա աղջիկը դեռևս գտնվում են հիվանդանոցում. անցկացվել է դատաբժշկական փորձաքննություն
Արմինֆո. Հաշվի առնելով այն հանգամանքը, որ իրավապահ մարմինները, ունենալով տեղեկություն «Երկիր ծիրանի» կուսակցության առաջնորդ Զարուհի Փոստանջյանի և նրա աղջկա՝ Լիլիթ Դրամփյանի նկատմամբ բռնության կիրառման մասին, սակայն մինչ այս պահը քրեական գործ չեն հարուցել, Զարուհի Փոստանջյանը ներկայացրել է հաղորդում հանցագործության մասին:
Նշենք, որ Զարուհի Փոստանջյանը և Լիլիթ Դրամփյանը ներկայումս գտնվում են «Արմենիա» բժշկական կենտրոնում: Նրանց վիճակի մասին պաշտոնական բժշկական եզրակացություն առայժմ չկա: Փոստանջյանը հիվանդանոց է տեղափոխվել մայիսի 16-ին, իսկ նրա աղջիկն արդեն երկրորդ օրն է, ինչ գտնվում է բժիշկների հսկողության տակ: «Արմենիա» բժշկական կենտրոնում ԱրմԻնֆո-ի թղթակցին հայտնել են, որ Լիլիթ Դրամփյանն ունի բարձր ջերմություն, գլխացավեր և սրտխառնոց, բժիշկները դեռևս արգելում են նրան տեղաշարժվել: «Երկիր ծիրանի» կուսակցության առաջնորդի վիճան ավելի կայուն է, մարմնի տարբեր մասերի վրա կան կապտուկներ և վնասվածքներ:
«Երկիր ծիրանի» կուսակցությունում ԱրմԻնֆո-ի թղթակցին հայտել են, որ դատաբժշկական փորձաքննության հաջողվել է հասնել բազմաթիվ դիմումներից հետո միայն: Իսկ քանի որ, բժիշկների խորհրդով, Զարուհու աղջիկը չի կարող տեղաշարժվել, դատաբժշկական փորձագետներն ստիպված իրենք են հիվանդանոց եկել:
Նշենք, որ ՀՀ ոստիկանությունը մայիսի 14-ին Ավան համայնքում բռնություն է գործադրել ԱԺ պատգամավոր, Երևանի քաղաքապետի թեկնածու Զարուհի Փոստանջյանի նկատմամբ, ով, ՀՀ օրենսդրության համաձայն, անձեռնմխելիության կարգավիճակ ունի: Մասնավորապես, մի քանի ոստիկան բռնի կերպով դուրս են հանել Փոստանջյանին Ավանում Հանրապետական կուսակցության նախընտրական շտաբից և տարել մինչև ոստիկանական մեքենան: Այնուամենայնիվ, ոստիկաններին չի հաջողվել պատգամավորին մեքենա նստացնել, իսկ ահա նրա աղջկան հաջողվել է տանել ոստիկանության Նոր Նորքի բաժին: Վրջինիս մոտ ախտորոշվել է ուղեղի ցնցում: