Юсупов Iилман. Седане

Юсупов Iилман

СЕДАНЕ

Бус-буса сан ойла тIеийзо марзбелла седа,

Байбеш сан синлазам, ахь говза йо суна гIоли.

Суьйранна малх бузуш болало хьо суна къеда,

Iуьйранна cатосуш дIабов хьо, баьгна а болий.

Генара лепа хьан дуьне ду – цIеран дарц тIома,

Ткъа, нур хьан мел сирла лепахь а, ду чIогIа къена.

Шийлачу шелонца хьо хIунда хьоьжу соь гома -

Экамчу буьртиге Лаьттарчу йовхачу ченан?

Моттало сих-сиха, дийна а буй-те хьо, олий,

Седарчий делча а, серло ца ле олу церан:

Эзарнаш бIешерийн боданех майрра чекхйолий,

Хета и схьайогIуш есаллин чкъура юккъера.

Хьо белла Iиллахь а, хьан долахь стигал ю сийна.

МIаьргонан IиндагIа ду со хьан кхолламна хьалха.

Седарчийн тобанехь хьо цхьаъ бу со санна, тийна. 

Адамийн пхьоьханехь со а ву хьо санна, цхьалха.