Скрипаль а, цуьнан йоI а лардан некъаш лоьхуш ю Британин
Оьрсийчоьнан тIеман ницкъийн Коьртачу талламан урхаллан полковник хиллачу Скрипаль Сергейна а, цуьнан йоIанна а, керла кехаташ а кечдина, и шиъ хила мегачу тIелетарех Iалаш дан Iамеркехь даха хаон некъаш лоьхуш ю Британи. Цунах лаьцна яздо Британерчу Sunday Times газето.
Цо дийцарехь, Британин MI6 къайлахчу сервисо и хаттар дийцаре дина Iамеркан Коьртачу талламан урхаллан векалшца.
Скрипаль а, цуьнан йоI а карийнера Солсбери гIалахь урамерчу гIаьнта хиина кхетам чуьра даьлла а долуш.
Британино бехке деш ду президентан Путин Владимиран Iедал, Советан пачхьалкхехь кечдинчу "Новичок" олучу тIеман дIаьвшах пайда а эцна, Скрипаль вен гIортарна.
Оьрсийчоьно тIе ца дуьту ша бехке хилар. Скрипаль Сергейца а, цуьнан йоIаца а хиллачу инциденто дипломатин кризис эккхийтина Москохна а, Малхбузенна а юкъахь.