პროკურატურა ფარული ჩანაწერების საქმეზე შვიდი პირის პატიმრობას ითხოვს
საქართველოს პროკურატურა ფარული ჩანაწერების საქმეზე დაკავებული რვა პირიდან შვიდის მიმართ პატიმრობის, ხოლო ერთი პირის მიმართ - გირაოს შეფარდებას მოითხოვს.
ამის შესახებ გახმაურებული საქმის პროკურორმა თორნიკე მარსაგიშვილმა ჟურნალისტებს განუცხადა.
„ამ 7 პირიდან თითოეულმა მათგანმა არაერთ პირზე გაავრცელა აღნიშნული პირადი ცხოვრების საიდუმლოს შემცველი ინფორმაცია. ამ 7 პირიდან ერთ-ერთი არის ის, რომელმაც youtube-ზე, საჯარო ინტერნეტ-სივრცეში ვიდეო პორტალზე ატვირთა აღნიშნული ვიდეოჩანაწერი. გვაქვს ამ პირის ტელეფონიდან გამოთხოვილი ინფორმაცია, ასევე youtube-დან მოპოვებული ინფორმაცია და საკმარისი მტკიცებულებები, რაც მის მიმართ დევნის დაწყების საფუძველი გახდა", - განაცხადა მარსაგიშვილმა.
ფარულ ვიდეოჩანაწერებთან დაკავშირებით პოლიციამ 17 პირი დააკავა. თბილისის საქალაქო სასამართლომ დღეს 9 პირის მიმართ აღკვეთის ღონისძიების შეფარდებაზე უკვე იმსჯელა. 9 პირიდან ორს აღკვეთის ღონისძიების სახით პატიმრობა შეეფარდა, შვიდს კი, გირაო.
გამოძიების ინფორმაციით, აღნიშნული პირები სოციალური ქსელის და მობილური ინტერნეტ აპლიკაციის მეშვეობით ინახავდნენ და მასობრივად ავრცელებდნენ პირადი ცხოვრების ამსახველ ვიდეოჩანაწერს.