დონალდ ტუსკი უკრაინულად გამოვიდა უკრაინის პარლამენტის სხდომაზე
ევროკავშირის საბჭოს პრეზიდენტმა დონალდ ტუსკმა მონაწილეობა მიიღო უკრაინის პარლამენტის სხდომაზე, რომელიც მიეძღვნა ევრომაიდნად ცნობილი მოვლენების - ღირსების რევოლუციისა და მშვიდობიან მომიტინგეთა დარბევის - მეხუთე წლისთავს.
ტუსკმა უკრაინულად მიმართა ვერხოვნა რადას დეპუტატებს. მან აღნიშნა, რომ ევროკავშირი არასოდეს აღიარებს რუსეთის მიერ ყირიმის ანექსიას და ძალაში დატოვებს სანქციებს მოსკოვის წინააღმდეგ. მანვე უკრაინელ პოლიტიკოსებს მოუწოდა, უფრო შედეგიანად ებრძოლონ კორუფციას და უარი თქვან რადიკალური ნაციონალიზმის პოპულიზმზმე.
ვერხოვნა რადაში სხდომის დაწყებამდე, ტუსკმა და უკრაინის პრეზიდენტმა პეტრო პოროშენკომ პატივი მიაგეს „ზეციური ასეულის“ - მაიდანზე მოკლული დემონსტრანტების ხსოვნას.
სხდომის მსვლელობაში, პოროშენკომ ხელი მოაწერა კანონს კონსტიტუციაში ცვლილების შესახებ ევროატლანტიკური კურსის გასამყარებლად. პოროშენკომ პირობა დადო, რომ გააკეთებს ყველაფერს, რათა 2023 წლამდე შეიტანოს განაცხადები ევროკავშირსა და ნატოში უკრაინის მიღების თხოვნით.
მოსკოვი კატეგორიულად უარყოფს უკრაინის მიმართ აგრესიის ბრალდებას, ხოლოდ 2014 წელს ყირიმის ანექსიას უწოდებს ისტორიული სამართლიანობის აღდგენას.