ეროვნული ბანკი პარლამენტში თიბისი ბანკის საკითხზე მსჯელობას არ აპირებს
საქართველოს ეროვნული ბანკი პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე თიბისი ბანკის საკითხზე საუბარს მიზანშეუწონლად მიიჩნევს. ამ საკითხზე ეროვნულმა ბანკმა საგანგებო განცხადება გამოაქვეყნა. განცხადებაში აღნიშნულია:
„საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის მომართვის შემდგომ, 21 თებერვალს გავრცელდა ეროვნული ბანკისა და თიბისი ბანკის ერთობლივი განცხადება, რომლის თანახმად, კომიტეტის მიერ შემოთავაზებული განსახილველი საკითხი ორივე მხრიდან ამოწურულია.
ამასთანავე, "თიბისი ბანკი" წყვეტს სასამართლო დავებს ეროვნული ბანკის წინააღმდეგ და იზიარებს ეროვნული ბანკის მხრიდან დაწესებულ მოთხოვნებს. იმავე დღეს, ეროვნულმა ბანკმა გამოაქვეყნა ამ საქმესთან დაკავშირებული დამატებითი დეტალები, რომელიც ეროვნული ბანკის მიმართ არსებულ ყველა კითხვას მაქსიმალურად სრულად პასუხობს.
მარეგულირებლის მიერ გამოყენებული საზედამხედველო ზომების განხილვა, მით უმეტეს მას მერე, რაც თავად ეს სუბიექტი აღნიშნულ ღონისძიებებს დაეთანხმა, დარგის სპეციფიკის და ეროვნული ბანკის პასუხისმგებლობის გათვალისწინებით არამიზანშეწონილად მიგვაჩნია.“
განცხადებაში ეროვნული ბანკი პარლამენტს სთავაზობს მოგვიანებით განიხილონ კომიტეტის სამუშაო დღის წესრიგით გათვალისწინებული პირველი საკითხიც, რომელიც ეროვნული ბანკის მიერ 2019 წლის 1 იანვარს შემოღებულ რეგულაციებს ეხება:
„ეროვნული ბანკი ინტენსიურად აკვირდება რეგულაციის მიმდინარეობის პრაქტიკას და ამ ეტაპზე რაიმე კონკრეტული დასკვნის გამოტანა ნაადრევია. აქედან გამომდინარე, ეროვნული ბანკი საქართველოს პარლამენტს აღნიშნული საკითხის მოგვიანებით განხილვას სთავაზობს.“
ეროვნული ბანკის განცხადების მიუხედავად, ბანკის პრეზიდენტის, კობა გვენეტაძის, მოსმენა პარლამენტის დარგობრივი ეკონომიკის კომიტეტის სხდომის დღის წესრიგიდან არ იხსნება. კომიტეტის სხდომა 26 თებერვალს, 12 საათზეა დანიშნული. მასზე ოპოზიციის მოთხოვნით, ეროვნული ბანკის პრეზიდენტის გარდა, მიწვეულნი არიან ასევე თიბისი ბანკის სამეთვალყურეო საბჭოს ყოფილი თავმჯდომარე მამუკა ხაზარაძე და თავმჯდომარის ყოფილი მოადგილე ბადრი ჯაფარიძე.
როგორც პარლამენტის დარგობრივი ეკონომიკის კომიტეტის თავმჯდომარემ, რომან კაკულიამ განუცხადა მედიასაშუალებებს, იმის მიუხედავად, დაესწრება თუ არა სხდომას კობა გვენეტაძე, კომიტეტი თიბისი ბანკთან დაკავშირებულ საკითხებზე მაინც იმსჯელებს.მამუკა ხაზარაძე და ბადრი მაისურაძე პარლამენტში მისვლას გეგმავენ.