დათა ვანიშვილის პანაშვიდზე ოპოზიციონერი ლიდერები მივიდნენ
საოკუპაციო ზოლს მიღმა დარჩენილი დათა ვანიშვილის პანაშვიდზე დღეს დილიდან სამოქალაქო აქტივისტებთან ერთად ოპოზიციონერი ლიდერები მივიდნენ. ოჯახს სამძიმარი გამოუცხადეს: "ლეიბორისტული პარტიის" ლიდერმა შალვა ნათელაშვილმა, "ნაციონალური მოძრაობის" ლიდერმა სალომე სამადაშვილმა, "სტრატეგია აღმაშენებლის" წევრმა თეონა აქუბარდიამ და მოძრაობა "დროას" დამფუძნებელმა ელენე ხოშტარიამ.
"დათა ვანიშვილი საქართველოს უკვდავი ჯარისკაცია და ის ასეთად დარჩება მუდამ და მისი სული ცხონდება მაშინ, როცა მის გაყოფილ მამულს გავაერთიანებთ", - თქვა შალვა ნათელაშვილმა.
თეონა აქუბარდია ამბობს, რომ დათა ვანიშვილი არის საქართველოს ოკუპაციის სიმბოლო: "დათა პაპა იყო ადამიანი, რომელმაც მსოფლიოს გააცნო, რომ საქართველო ოკუპირებულია".
"ეს არის სამწუხარო რეალობა, რომ დღეს არც კი გვაქვს შესაძლებლობა, მის ოჯახში მივიდეთ და პატივი მივაგოთ. ეს მავთულხლართები არ გვაძლევს შესაძლებლობას", - თქვა სალომე სამადაშვილმა.
დათა ვანიშვილს ოკუპაციასთან შეუგუებლობის სიმბოლო უწოდა ელენე ხოშტარიამ: "სამშობლოს სიყვარული ესაა, რომ მან თქვა, არ დატოვებდა თავის სახლს და არ აინტერესებდა, რამდენად საშიში იყო".
ოპოზიციონერი ლიდერების ჩასვლამდე საოკუპაციო ხაზთან მივიდა ვაჟა გაფრინდაშვილი, რომელიც საოკუპაციო ძალებს თვეების წინ დაკავებული ჰყავდათ:
"მიუხედავად ასაკისა, მან ბოლო ამოსუნთქვამდე იბრძოლა თავისი მეობის, თავისი მიწა-წყლის შესანარჩუნებლად, რომ არ დაკარგვოდა საქართველოს კიდევ ერთი პატარა კუთხე. სამწუხაროდ, ალბათ, უფრო მეტი ყურადღება სჭირდება და ამ მეტი ყურადღებით უფრო უკეთეს მდგომარეობაში იქნებოდა ოკუპირებულ ტერიტორიაზე".
რადიო თავისუფლების ინფორმაციით, ხვალ, როცა დათა ვანიშვილს კრძალავენ, ადგილზე ჩასვლას გეგმავენ ხელისუფლების წარმომადგენლებიც.
გორის მუნიციპალიტეტის სოფელ ხურვალეთში, საოკუპაციო ხაზის მიღმა, 88 წლის დათა ვანიშვილი 19 მარტს გარდაიცვალა. ბოლო დროს ის ავადმყოფობდა და ძირითადად ლოგინში იწვა. მას ხვალ, 22 მარტს დაკრძალავენ.
88 წლის დათა ვანიშვილი, ფაქტობრივად, საოკუპაციო ხაზზე მცხოვრები ერთადერთი საქართველოს მოქალაქე იყო, ვისთანაც პირადი კომუნიკაცია ჰქონიათ დემოკრატიული ქვეყნების იმ ლიდერებს, ვინც საქართველოში ვიზიტის დროს საოკუპაციო ზოლთან გასულა.
სხვადასხვა დროს დათა ვანიშვილს შეხვდნენ ლეხ კაჩინსკი, ჯონ მაკკეინი, უკრაინის ყოფილი პრეზიდენტი პეტრო პოროშენკო, ევროპარლამენტის, ეუთოს, გაეროსა და სხვა მრავალი ორგანიზაციის თუ ქვეყნის წარმომადგენლები და დიპლომატები.