ჯაფარიძის თქმით, პარლამენტიდან უნდა გამოვიდნენ ისინიც, ვისაც „ოპოზიციური დეპუტატები ჰქვიათ"
რუსთაველის გამზირზე საქართველოს ხელისუფლების წინააღმდეგ და უკრაინისთვის სოლიდარობის გამოხატვის მიზნით მიმდინარე აქციაზე, პარტია „გირჩი - მეტი თავისუფლების" ლიდერმა ზურაბ ჯაფარიძემ განაცხადა, რომ საჭიროა რიგგარეშე არჩევნების ჩატარება. პოლიტიკოსს მიაჩნია, რომ ხელისუფლების გარდა, პარლამენტი უნდა დატოვონ იმ ადამიანებმა, რომლებსაც „ოპოზიციური დეპუტატები ჰქვიათ".
ჯაფარიძე აღნიშნავს, რომ მოქალაქეებს აქვთ კითხვა, რა არის გასაკეთებელი?
„არავის არ აქვს ზუსტი წარმოდგენა, რა შეიძლება ჩვენ ვქნათ. მე შემიძლია გითხრათ, მე რას ვფიქრობ პირადად. დღეს უკრაინის პრეზიდენტმა ზელენსკიმ გვითხრა, რომ ეს შენობა [საქართველოს პარლამენტის], რომელიც ჩვენს უკან არის და რომელსაც უზარმაზარი სიმბოლური მნიშვნელობა აქვს დამოუკიდებელი საქართველოს ისტორიაში, არის კრემლი.
ერთადერთი, რაც დარჩა ამათ [ხელისუფლებამ] რომ გააკეთონ, ელჩის გაწვევის გარდა, სირცხვილი რომ კიდევ ვჭამოთ, არის ის, რომ დაუთმონ საქართველოს ტერიტორია უკრაინაზე თავდასხმისთვის, რასაც აკეთებს ბელარუსი. თუ დაემუქრებიან კრემლიდან, ამის გამკეთებლებიც არიან. ხო ვხედავთ, რომ ყველაფერზე წამსვლელები არიან.
ჩვენ უნდა მივიდეთ რიგგარეშე არჩევნებამდე, მაგრამ გამოსავალი არის ის, რომ ამ შენობიდან უნდა გამოვიდნენ ისინი, ვინც კრემლს წარმოადგენენ. მათ შორის უნდა გამოვიდნენ ისინი, ვისაც ოპოზიციური დეპუტატები ჰქვიათ, - თქვა ჯაფარიძემ და აქციის მონაწილეებს მიმართა, - ამ შენობაში უნდა შეხვიდეთ თქვენ, ამ ქვეყნის მოქალაქეები და არა პოლიტიკოსები. ეს შენობა არის თქვენი. ჩემი აზრით, ეს უნდა დაიწყოთ დღეს. რომ მორჩება გამოსვლები, ამ შენობის გარშემო არის უამრავი პოლიციელი, განსაკუთრებით ახალგაზრდებო, არ დაიშალოთ, მიდით და პოლიციელებს აუხსენით, სად დგანან, რას იცავენ, ვის იცავენ და რა დგას სასწორზე".
რუსთაველზე მორიგი საპროტესტო აქციის გამართვის შესახებ მას შემდეგ გამოცხადდა, რაც 1 მარტს, უკრაინაში ომის დაწყების მეექვსე დღეს, უკრაინის პრეზიდენტმა საქართველოდან ელჩი გაიწვია, მათთვის დახმარების მსურველი მოხალისეებისთვის ხელის შეშლისა და სანქციებისადმი გამოხატული პოზიციების გამო.
გუშინ, 28 თებერვალს, საქართველოდან ვერ გაფრინდა მოხალისეთა ის ჯგუფი, რომელიც ამბობდა, რომ უკრაინაში ჩასვლა და მეგობარი ქვეყნისთვის დახმარება სურდა.
უკრაინის პრემიერ-მინისტრმა დენის შმიჰალმა "ტვიტერზე", მათ შორის, ქართულ ენაზე გამოაქვეყნა ტექსტი, რომელშიც იმედს გამოთქვამდა, რომ ქართველ მოხალისეებს უკრაინაში ჩასვლა შეეძლებათ.
"მამაცი ქართველი ძმები უკრაინის დასახმარებლად აეროპორტში ფრენას ელოდებიან. იმედია, ღარიბაშვილი გამბედაობას გამოიჩენს და ფრენის ნებართვას გასცემს. უკრაინა ამას ელოდება! ევროპა ამას ელოდება", - დაწერა მან.
"ქართული ოცნების" თავმჯდომარე ირაკლი კობახიძე საქართველოდან უკრაინის ელჩის გაწვევას ქვეყნის ომში "ჩათრევის" სურვილით ხსნის.
"სამხედრო კონფლიქტში ჩვენ ვერ ჩავერთვებით. იყო პირდაპირი მცდელობა, მოხალისეების გაგზავნის ორგანიზების ნაწილში, რომ ჩავრთულიყავით სამხედრო კონფლიქტში. ეს ვერ იქნა მიღწეული და ამას მოჰყვა ეს ძალიან სამწუხარო ნაბიჯი [ელჩის გაწვევა]..." - თქვა კობახიძემ.
24 თებერვალს რუსეთი უკრაინის ტერიტორიაზე სამხედრო ძალებით შევიდა და სრულმასშტაბიან საომარ მოქმედებებს ატარებს. რუსეთს შესაჩერებლად აშშ-მ, ევროკავშირმა, კანადამ, დიდმა ბრიტანეთმა და ა.შ. სანქციები დაუწესეს. საქართველოს პრემიერ-მინისტრი ირაკლი ღარიბაშვილი ამბობს, რომ "ეროვნული ინტერესებიდან" გამომდინარე, არ აპირებს შეუერთდეს ამ სანქციებს.