ზელენსკის თქმით, საუდის არაბეთში მისი ვიზიტი არაა დაკავშირებული აშშ-რუსეთის შეხვედრასთან
უკრაინის პრეზიდენტმა ვოლოდიმირ ზელენსკიმ განაცხადა, რომ საუდის არაბეთში მის ვიზიტს, რომელიც ოთხშაბათისთვისაა დაგეგმილი, „არავითარი კავშირი არა აქვს“ აშშ-სა და რუსეთს შორის მოლაპარაკებებთან, რომელიც სამშაბათს გაიმართება საუდის არაბეთში. ამის თაობაზე „ინტერფაქს-უკრაინა“ იტყობინება.
„უკრაინამ ამის შესახებ არაფერი არ იცოდა. და უკრაინას მიაჩნია, რომ უკრაინის შესახებ მოლაპარაკებები უკრაინის გარეშე არავითარ შედეგს არ გამოიღებს,“ აღნიშნა ზელენსკიმ. მისი თქმით, კიევი არ აღიარებს ამ შეხვედრაზე მიღწეულ შეთანხმებებს.
ზელენსკის სიტყვებით, მოლაპარაკებების შესახებ ის ესაუბრება საუდის არაბეთის პრემიერ-მინისტს, ტახტის მემკვიდრე პრინც მუჰამედ ბინ სალმანს.
როგორც BBC იტყობინება, უკრაინის პრეზიდენტმა ჟურნალისტებთან შეხვედრაზე თქვა, რომ 20 თებერვალს უკრაინაში ჩავა აშშ-ის პრეზიდენტის სპეციალური წარგზავნილი უკრაინის საკითხებში, კით კელოგი, და მინიმუმ ორი დღით დარჩება ქვეყანაში.
„მინდა ფრონტის ხაზზე წავიყვანო ის და, იმედი მაქვს, უარს არ მეტყვის,“ თქვა ზელენსკიმ.
17 თებერვალს ზელენსკი არაბთა გაერთიანებულ საამიროებში იმყოფებოდა. სხვა საკითხებთან ერთად მან მოლაპარაკებები გამართა აგს-ის როლზე რუსეთის ტყვეობიდან უკრაინელი სამხედრო ტყვეების განთავისუფლების საქმეში.
