Шаардык сотто Жакупова менен Айыптын аппеляциялык арызы каралат
Жакупова менен Нарын Айып Октябрь райондук сотунун чечимдерине макул болбой, шаардык сотко даттанган. Доо арызды кароо өткөн аптада 7-февралга белгиленген.
Айыпталуучулар аппеляциялык арыз каралган учурда камакка алынган мүлктөрдү сатыкка коюу тууралуу жараянды токтото турууну өтүнүп, сот муну канааттандырган. Мүлктөргө байланышкан сотту 14-февралга калтырган.
Буга чейин экс-президент Алмазбек Атамбаевдин өкүлү Нурбек Сыдыков Чолпон Жакуповага таандык Ысык-Көлдөгү коттеджди жана Нарын Айыптын учурда жашап жаткан батирин сатыкка чыгаруу, анын эсебинен айыппулду өндүрүү талабы менен сотко кайрылган. Анын алдында соттун чечими менен сөз болуп жаткан имараттар камакка алынган.
Башкы прокурордун Атамбаевдин ар-намысын коргоо боюнча арызына ылайык, Zanoza.kg сайтынан жалпысынан 27 миллион сом өндүрүү тууралуу сот чечими чыккан. Мунун ичинен басылма 15 миллион сом, Нарын Айып 9 миллион сом, Дина Маслова 3 миллион сом төлөөгө милдеттүү болгон.
Ушундай эле өңүттөгү кине менен “Адилет” укук коргоо клиникасынын жетекчиси Чолпон Жакупова 3 миллион сом, “Ата Мекен” партиясынын юристтери 10 миллион сом айыпка жыгылган.
Өлкөдөгү жана эл аралык уюмдар бул сот чечимине байланыштуу тынчсыздануусун билдирип, аны сөз эркиндигине басым катары баалаган.
Кыргызстан журналисттеринин эркин биримдиги, 17 медиа жана эл аралык уюм да доого жыгылган журналисттерге каражат топтой баштаган. (NT)