Кыргызстандык аял чет элдик шылуундарга 32 миң долларын алдатып жиберди
Билдирүүдө айтылгандай, мекеменин Жети-Өгүз, Түп, Ак-Суу райондору жана Каракол шаары боюнча бөлүмүнө аталган жаран арыз менен кайрылган. Анда ал интернет сайттан тез арада киреше таба алаары тууралуу маалымат алганын, аларга алданып калганын жазган.
Аял алгач prcfinancials.com (эскертүү үчүн финпол шылуун сайттын атын атайын белгилейт) сайтынан каттоодон өткөн, андан кийин сайттын кызматкерлери байланышка чыгып алардын баракчасынан эсеп ачууга ишендиришкен. Натыйжада кыргызстандык аял бул сайттан банктык эсеп ачып, ага былтыр декабрь айынан ушул жылдын февраль айына чейин 32 миң доллар акча салган. Бирок ал акчаны сайттан шылуундук жол менен Леонид Карамазов аттуу жаран өзүнө ыйгарып алган.
Факт боюнча Кылмыш-жаза кодексинин 166-беренеси ("Алдамчылык") менен кылмыш иши козголду. Тергөө уланууда. (ErN)