Шаардык сот Самаковдун ишин карап жатат
Алардын бири, Жогорку Кеңештин мурдагы депутаты Эсенгул Исаков "Фейсбук" аркылуу видеокайрылуу таратып: “Өкүм чыгат окшойт, болгондо да жаман жагына ооп бараткандай. Буюртманы дагы эле аткарып жатышат” деди.
"Жер тилкесин мыйзамсыз трансформациялаган" деп айыпталган Самаковду былтыр 19-декабрда Бишкектин Октябрь райондук соту Кылмыш-жаза кодексинин “Кылмышка шериктеш болуу”, “Коррупция” беренелеринин негизинде 10 жылга эркинен ажыратууга өкүм чыгарган болчу. Аны менен кошо уулу жана төрт санаалашы сегиз жылга кесилген. Бул кылмыш иши боюнча экс-премьер-министр, депутат Игорь Чудинов менен мурдагы вице-премьер-министр Искендербек Айдаралиевдерге айыппул салынган.
Самаков 2015-жылдан бери үй камагында жатканын эске алып жана мунапыстарга ылайык абак мөөнөтү үч жылга чейин кыскартылып, натыйжада ал сот залынан камакка алынган.
Айыптоочу тарап далилдер жетиштүү экенин айткан. (RK)