Жыгачтан жасалган "Барсбек" инсталляциясынын 58 даанасынын ар бири 600 доллар турат (видео)
Тарых музейинин кызматкери 58 даана жыгачтан жасалган "Барсбек" деп аталган инсталляциянын ар бири 600 доллардан экенин "Азаттыктын" кабарчысына айтып, инсталляция интеллектуалдык эмгек экенин, дал ошол себептен анын баасы кымбат экенин айтты.
"Ата Мекен" фракциясынын Жогорку Кеңештеги депутаты Бахадыр Сулайманов суроо узатты:
- Бул эмеректер албетте музейге керек. Бул биздин маданий мурасыбыз. Бирок эмеректерди мынча кымбат баага Германиядан алып келүүнүн зарылдыгы бар беле?
Парламент депутаты Каныбек Иманалиев да нааразылыгын билдирди:
- Азыр Кыргызстанда өндүрүлгөн эмеректер Казакстанга жана башка чет өлкөлөргө экспорттолуп жатат. Тарых музейинин эмеректерин өзүбүздөн алсак болбойт беле? Бул инсталляция жөнөкөй эле жыгач. Ар бирөө 600 доллар же бир жылкынын баасы.
Фракция мүчөлөрү Тарых музейинин эмеректерине ашыкча каражат сарпталган деп айтып чыгышкан. (KR)