ЦРУнун экс-башчысы Трампка каршы сотко кайрылууга даяр
Бреннан мындай кадамга Трамптын мурдагы жана учурдагы жетекчилерди купуя документтер менен таанышуу укугунан ажыратышына каршылык иретинде барышы мүмкүн.
Жекшембиде NBC каналынын эфиринде Жон Бреннан бул маселе боюнча бир нече адвокат менен сүйлөшкөнүн билдирди.
"Мен мындай кызматтан ашыкча пайдаланууга токтотууга бардык аракетти көрөм. Эгер бул үчүн сотко кайрылуу керек болсо мен мындай кадамга барам", - деди ЦРУнун мурдагы башчысы.
Буга чейин Дональд Трамп мурдагы президент Барак Обаманын тушунда Борбордук чалгын башкармалыгынын жетекчилигине келип, былтыр кызматтан кеткен Жон Бреннанды купуя маалыматтар менен таанышуу укугунан ажыраткан эле.
Трамп мындай чечимге барышы "Бреннан жашыруун маалымат алуу укугунан пайдаланып, анын администрациясына башаламандык жаратып келген" деп түшүндүрүлгөн эле.
Ошондой эле Ак үй АКШнын президенти дагы бир нече жогорку даражалуу аткаминерди ушундай укуктан ажыратууну көздөп жатканын билдирген.
"Кара тизмеге" кабылышы мүмкүн деп эсептелгендердин арасында былтыр президент Трамп кызматтан алган Федералдык иликтөө бюросунун (ФБР) директору Жеймс Коми да бар. Ал Трампты "президент болууга моралдык жактан татыксыз" деп мүнөздөгөн. Ак үй билдиргендей, Комиден тышкары Обаманын тушунда Улуттук чалгын кызматын жетектеген Жеймс Клэппер, президенттин улуттук коопсуздук боюнча мурдагы кеңешчиси Сюзан Райс, ФБРдин жетекчисинин мурдагы орун басары Эндрю Маккейб жана Улуттук коопсуздук агенттигинин мурдагы башчысы Майкл Хейден да санкциялык тизмеге түшүп калышы мүмкүн.