Пакистандын жаңы премьери экономиканы өнүктүрүүгө убада берди
Өкмөт башчылыгына келген мурдагы крикет жылдызы Хан "Пакистанды жакырларды колдоого алган мыкты өлкө катары көргүм келет” деп айтты.
Ал 192 миллион адам жашаган өлкөдө байлар менен жакырлар ортосунда ажырым жылдан-жылга чоңоюп баратканына өкүнүчүн жашырган жок.
Хан үнөмдөө саясатын жүргүзүп, учурда Пакистандын 95 миллиард доллардан ашык тышкы карызын кыскартууга аракет кыларын белгиледи.
Ошондой эле сыртта жүргөн пакистандыктарга кайрылып, акчасын өз мекениндеги банктарга сактоо менен Пакистандын учурдагы финансылык абалын жакшыртууга жардам берүүгө чакырды.
Имран Ханды 17-августта Пакистан парламенти премьер-министр кылып шайлаган. Хан парламенттин 343 орундуу төмөнкү палатасында 176 добушка ээ болгон эле.