Түндүк Корея ИКАОнун текшерүүсүнө макул болду
ИКАОнун Монреалдагы кеңсеси кабарлагандай, эксперттер эл аралык авиакаттамдар Түндүк Кореянын ракеталык полигондору аркылуу өтпөгөнүнө көз салышы керек. Буга чейин Пхеньяндын өкүлү инспекторлор барган учурда мындай кепилдик берилерин убада кылган.
Дүйнөнүн 192 өлкөсү мүчө болгон ИКАО 2019-жылы Түндүк Корея ракеталык сыноолору тууралуу эл аралык жарандык авиация тармагына маалымдоо үчүн кандай чаралар көрүлүп жатканын да текшериш керек.
2017-жылы Түндүк Корея жарандык авиацияга коркунуч келтирген учууларды токтотууга убада берген. Мындай аракеттерге узак аралыктагы ракетаны сыноо да кирет.
Пхеньян мындай сыноолорду ишке ашырса алдын ала маалымат берүүгө милдеттенме алган. Былтыр Түндүк Корея көп сандаган ракеталарды учурган.
Бул аймактын үстүнөн учкан учактарга коркунуч туудурган. Маселен, июлдун аягында Токиодон Парижге учуп бараткан Air France компаниясынын учагынын каттамы бир нече мүнөт мурда ракета учуп өткөн багытка туш келген эле.