Ак үй: Дональд Трамптан коронавирус табылган жок
АКШнын президенти Дональд Трамп коронавируска тест тапшырып, жыйынтыгы таза чыкканын Ак үйдүн дарыгерлери билдиришти.
14-марттын кечинде президенттин дарыгери Шон Конли Бразилиянын расмий делегациясы менен бир апта мурда Дональд Трамп чогуу тамактанганын, ушундан улам вируска тест тапшырганын айтты.
Бразилиянын Вашингтондогу элчилиги 13-мартта Трамп менен бир үстөлдө тамак жеген элчинин убактылуу милдетин аткаруучу Нестор Фостерден коронавирус аныкталганын маалымдаган эле.
13-мартта Трамп АКШда өзгөчө кырдаал жарыялаган. Чек аралар жабылып, Европага, Кытайга каттамдар токтогон.
Дүйнөлүк саламаттык сактоо уюмунун 14-марттагы маалыматы боюнча, дүйнөнүн 135 мамлекетинде коронавирусту жуктургандар 142 миңден ашты. Вирустан баш-аягы 5 миңден ашык киши көз жумду.
АКШдагы Жон Хопкинс университетинин маалымат базасы вирус 153 миңден ашык кишиге жукканын жана 5789 адам өлгөнүн көрсөтүп жатат. (BCh)