Новости за 10.07.2019

Белорусија речиси ги исполни условите за заем на 600 милиони долари од Кина кој ќе биде искористен за исплаќање на долговите на Русија. Министерството за финансии соопшти дека планирале да земат уште еден заем од Русија, но нашле алтернатива со нивните кинески партнери. Министерот за финансии Максим Ермалович претходно изјави дека властите сакаат да позајмат пари од друга земја, а не од Русија поради разликите во билатералните односи. Русија со години и дава заеми на Белорусија, која се уште и должи многу пари на земјата.

Експертите се скептични дека новиот закон што го носи Собранието за зачување на природното и културно наследство ќе им помогне на институциите да се справат со дивоградбите во Охрид. Тие велат дека е потребно посуштински да се дејствува за спас на Охрид.

Меѓународната агенција за атомска енергија одржува итен состанок за Иран откако земјата соопшти дека по втор пат го прекршила нуклеарниот договор со светските сили. Состанокот на Управниот одбор на агенцијата е повикан од страна на САД. Иран соопшти дека намерно прекршил два клучни аспекти од договорот од 2015 година како одговор на одлуката на Вашингтон да се повлече од него и повторно да воведе санкции врз земјата. Техеран сега збогатува ураниум над одредената граница во договорот.

Магичното копче во АКМИС системот за тоа кој судија ќе биде одговорен за правдата повторно го сврте окото на јавноста кон судовите.

Израелскиот министер за образование Рафи Перец ги спореди мешовитите бракови на Евреите во Северна Америка со холокаустот. Неговиот портпарол потврди дека тој на седница на израелската влада рекол дека „асимилацијата е како холокауст“. Перец е лидер на верска националистичка партија и поранешен рабин во израелската војска. Поголемиот дел на американската еврејска заедница им припаѓа на полибералните струи, додека меѓу израелските Евреи преовладува ортодоксниот јудеизам.

Специјалниот пратеник на ОН за Сирија Геир Педерсен кој се наоѓа во Дамаск изјави дека се надева на конструктивни разговори со сириските валсти за формирање уставен комитет кој треба да ја отвори вратата за поширок политички процес во земјата. Тој додаде дека на денешните разговори ќе стане збор и за начините за завршување на борбите во провинцијата Идлиб. Сирија е заглавена во граѓанска војна меѓу силите на претседателот Башар ал Асад и бунтовниците кои се обидуваат да го соборат од власт.

„Односот на српските власти спрема Сребреница е повеќе од поразувачки, бидејќи ни по 24 години од геноцидот не гледаме јасна нивна подготвеност да се оградат од него“, изјави Жељко Комшиќ, член на Претседателството на Босна и Херцеговина за денешното издание на весникот „Данас“. Тој оценува дека причината е во тоа што претседателот Александар Вучиќ и шефот на дипломатијата Ивица Дачиќ не се откажале од „погромскиот проект на Српската академија на науките и уметностите“.

Турскиот претседател Реџеп Таип Ердоган, говорејќи на економски самит на земјите од Југоисточна Европа во Јахорина, Босна и Херцеговина, изјави дека одлуките на Европската унија во врска со членството на Северна Македонија и Албанија во Унијата ќе влијаат врз иднината на регионот.

Соединетите држави планираат да формираат воена коалиција за заштита на бродските линии во близина на Иран и Јемен поради тензиите со Техеран. Генерал Џозеф Данфорд, шеф на американскиот Генералштаб, изјави дека Пентагон ќе обезбеди командна и разузнавачка опрема за коалицијата. Претходно тој имаше средба со државниот секретар Мајк Помпео и со вршителот на должноста секретар за одбрана Марк Еспер. Иран веќе подолго време се заканува да го затвори стратегискиот Ормуски теснец преку кој се одвива една петина од трговијата со нафта.

Американскиот претседател Доналд Трамп телефонски му честита на новиот премиер на Грција Киријакос Мицотакис, изразувајќи желба за зачувување на „топлите односи“ меѓу двете земји, соопшти Белата куќа. Претходно Стејт департментот оцени дека Грција е еден од „најблиските сојузници“ на САД и оти Вашингтон се надева оти ќе работи со Мицотакис за „зацврстување на регионалната стабилност и за диверзификација на регионалните енергетски опции“.

Ќе биде променливо облачно и нестабилно со пороен дожд и грмежи, особено попладне. На места процесите ќе бидат поинтензивни во форма на невреме со силен ветер, град и пообилни врнежи. Утринската температура ќе биде од 11 до 20, а дневната од 20 до 31 степен. Во Скопје и околината слично време. Утринската температура ќе биде околу 18, а дневната ќе достигне до 26 степени.