ملي امنیت وايي په کابل کې د مشکوکو تروریستانو ۷کسیزه ډله نیولې
د ملي امنیت عمومي ریاست ویلي چې دې کسانو پر دولتي ودانیو او روغتونونو د برید پلان درلود.
رویټرز خبري آژانس د دې ادارې په حواله لیکلي دي چې تورنو کسانو د تحقیقاتو پرمهال اعتراف کړی چې د کورنیو چارو وزارت پر زړه ودانۍ او د غازي امان الله خان په نوم د کابل په قوای مرکز کې د ملي امنیت پر روغتون د حملې پلان یې درلود.
په دې روغتون کې د افغان امنیتي ځواکونو علاج کېږي.
د ملي امنیت اداره وايي، دا کسان وروسته له دې چې د انتحاري حملو دنده ورکړل شوه د یوه ارتباطي کس له خوا پلازمینې کابل ته راوستل شول څو خپل پلان عملي کړي.
آژانس د ملي امنیت ادارې د یو چارواکي له قوله لیکي چې وايي، دا کسان د بلوچستان ایالت د چمن سیمې په بېلابېلو مدرسو کې روزل شوي وو.