غني: چارواکي باید خبریالانو ته له سلیقوي چلند پرته معلومات ورکړي
ارګ په یوه خبرپاڼه کې وايي چې ښاغلي غني دا څرګندونې پرون د ویډیويي کنفرانس له لارې والیانو، امنیتي مسوولانو او نورو ولایتي چارواکو ته وکړې او ټینګار یې وکړ چې د خبریالانو هرراز ګواښل جرم ګڼل کېږي.
خبرپاڼه زیاتوي چې ولسمشر په خپلو څرګندونو کې د انتخاباتو د شفافیت، د خلکو د ګډون او د فساد پرضد د مبارزې په اړه هم خبرې وکړې او ټینګار یې وکړ چې والیان باید د ولسي جرګې او ولسوالیو د شوراګانو په انتخاباتو کې مداخله ونه کړي.
له دې مخکې یوشمېر خبریالانو انتقاد کړی چې حکومت خبریالانو ته د معلوماتو په ورکولو کې ناغېړي کوي او د بېلابېلو رسنیو په وړاندې سلیقوي چلند کوي.