چارواکي: وسله والو مخالفینو په بغلان کې ۶ هندي انجنیران تښتولي
د بغلان چارواکي د وسلهوالو مخالفینو له لوري د شپږو هندي انجنیرانو او د هغوی د یوه افغان ډریور د تښتول کېدو خبر ورکوي.
د بغلان والي عبدالحی نعمتي نن یکشنبې ازادي راډیو ته د دې پېښې په تأیید سره وویل چې دغو انجنیرانو د خواجه الوان د برښنا پر سب سټیشن کار کاوه چې وسلهوالو نن سهار د کار ساحې ته په لاره د پلخمري د باغ شمال په سیمه کې له ځان سره بوتلل.
ښاغلي نعمتي د پېښې په اړه وویل:
"دوی د دوست هېواد هندوستان اتباع دي چې د خواجه الوان د برښنا په سب سټیشن کې کار کوي او نن یې غوښتل چې خپل کار ته لاړ شي چې د کوچه ملایان په سیمه کې یې موټر د دولت وسلهوالو مخالفینو ودراوه او هغوی یې له ځان سره بوتلل."
د بغلان والي زیاته کړه چې د قومي مشرانو په مرسته هڅې پیل شوي چې یرغمل شوي هندیان او د هغوی افغان ډریور ډېر ژر د وسلهوالو له منګولو راخوشې شي.
تراوسه د دې پېښې مسؤلیت کومې ډلې پر غاړه نهدی اخېستی، خو د ازادي راډیو سیمهییز خبریال وایي چې له هغې سیمې چې دوی تښتول شوي، هغه د وسلهوالو طالبانو د فعالیت ساحه ده.