د غوڅ ملاتړ ماموریت وايي، د فراه ښار د افغان پوځ په لاس کې دی
په افغانستان کې د ناټو په مشرۍ د غوڅ ملاتړ ماموریت وايي، فراه ښار د افغانستان د امنیتي ځواکونو په لاس کې دی.
د ناټو ماموریت په یوه خبرپاڼه کې نن وویل چې د امریکا «اې 10» جنګي الوتکو ته د افغان امنیتي ځواکونو د ملاتړ ماموریت سپارل شوی دی.
د افغانستان ولسمشر نن ملي دفاع وزارت ته ورغلی و او فراه ته یې د تازه امنیتي ځواکونو د استولو دستور ورکړ.
د افغانستان د ملي وحدت حکومت د اجرائیه ریاست ویاند، جاوید فیصل پر ټوېټر لیکلي چې نوي کوماندو ځواکونه د فراه ښار د پولیسو مرکز، د ملي امنیت ریاست او د فراه محبس ته استول شوي دي.
فیصل لیکلي چې د فراه اوسېدونکي د امنیتي ځواکونو ملاتړ کوي، جګړه روانه ده خو د روځې تر پایه به وضعیت بدل شي.
د ازادي راډیو خبریال وايي چې د امنیه قوماندانۍ ودانۍ او محبس د فراه په لوېدیځ کې دي چې وسله والو طالبانو محاصره کړي دي.
جګړه تر ډېره حده د ښار پر لوېدیځ متمرکزه ده خو د وسله والو طالبانو ویاند ذبیح الله مجاهد رسنیو ته ویلي چې له څو خواوو یې پر ښار حمله کړې ده.
پر فراه ښار له تېرې شپې راهیسې شدید جنګ روان دی.
فرانس پرس وايي، د فراه ښاریان د چاودنو او جګړې له امله وحشت ځپلي او درنه جګړه رو انه ده.