ستانکزی: د نشهيي توکو د قاچاق کوونکو پر خلاف ۲۲ عملیاتونه شوي
د کابل ولایت د امنیه قوماندانۍ ویاند حشمت ستانکزي د چهارشنبې په ورځ ازادي راډیو ته وویل چې د کابل پولیسو تېره اوونۍ د قاچاق کوونکو او پرچون خرڅوونکو پر وړاندې ۲۲ عملیات کړي چې په نتیجه کې یې ۲۴ کسان له ۲۲۷ ګرامه هیروئینو،۲۷ ګرامه شیشې، ۵۰۸ ګرامو چرسو او ۴۱۳ کیلو ګرامو تریاکو سره نیولي دي.
نوموړی وايي:
"په تېره یوه میاشت کې مو ۸۲ کسان ونیول چې د کابل ښار په بېلابېلو سیمو کې یې نشهيي مواد خرڅول. دغه ډول په هغو ځانګړو عملیاتو کې چې پولیسو په دهسبز ولسوالۍ کې ترسره کړل، څلور کسان يې له لسو کیلو ګرامو هیروئینو سره نیولي دي."
د یادونې وړ ده چې د کابل پولیسو د روان شمسي کال له پیله د نشهيي موادو د خرڅوونکو او کابل ښار څخه د معتادینو د راټولو په برخه کې عملیات پيل کړي چې تر اوسه یې تر زرو زیات معتادین را ټول او د درملنې مرکزونو ته سپارلي دي.