چارواکي: په موسی کلا کې هوايي حملې یو شمېر طالب مشران وژلي
د هلمند ولایت چارواکي وايي، په موسی کلا ولسوالۍ کې د وسله والو طالبانو یو شمېر مشران د نړیوالو ځواکونو په هوايي حملو کې وژل شوي دي.
د هلمند ولایت مطبوعاتي دفتر په یو خبرپاڼه کې وايي چې د ناټو په مشرۍ د غوڅ ملاتړ د ماموریت الوتکو پرون سهار په موسی کلا ولسوالۍ کې د وسله والو طالبانو پر دوو مهمو مرکزونو حملې وکړې چې په ترڅ کې یې د طالبانو ګڼ شمېر مشرانو ته مرګ ژوبله اوښتې او د تروریستي حملو مرکز یې له منځه وړل شوی دی.
په خبرپانه کې راغلي چې دا بمباري د طالب مشرانو پر یوه غونډه شوې، خو د وژل شویو دقیق شمېر او د طالب مشرانو نومونه نه دي ښودل شوي.
په دې اړه پرون د غوڅ ملاتړ ماموریت هم راپور ورکړی و، خو په دې اړه په خپله خبرپاڼه کې، د دې بمبارۍ دقیقه سیمه او د وژل شویو کسانو شمېر او هویت نه و، ښودل شوی.
وسله والو طالبانو بیا رسنیو ته په لېږل شوې خبرپاڼه کې ویلي چې په دغه حمله کې د دوی مشران نه بلکې په سیمه کې ملکي وګړي وژل شوي دي.