په نيپال کې د طوفان په نتيجه کې ۲۷ کسان وژل شوي
د معلوماتو له مخې، د نیپال په جنوب کې له څو ورځو راهیسې طوفانونو ونې او د برق ستنې له بېخه ايستلي چې له کبله يې خلکو ته زیان اوښتی دی.
د ژغورنې عمله سيمې ته رسېدلې او خلکو ته د مرستې رسولو عملیات دوام لري.
د نيپال د پوځ ژغورونکي ټيمونه د دې هېواد له پولیسو سره یو ځای له پلازمېنې کتمندو لسګونه کیلومتره لېرې په طوفان ځپلې باره سیمه کې د ژغورنې عملیات پر مخ وړي.
بېځایه شویو او زیانمنو شويو ته خوراکي توکي او روغتيايي خدمات رسول شوي.
په نیپال کې موسمي اورښتونه عادي وي، خو داسې لږ لیدل شوي چې سخت بارانونه وشي او پکې خلکو ته مرګ ژوبله واوړي.