د سوډان په پلازمېنه خرطوم کې نن هم د زرګونو کسانو پرلت دوام وکړ
زرګونه کسانو نن بیا هم د سوډان په پلازمېنه خرطوم کې د پوځ د مرکزي قرارګاه مخې ته خپل پرلت ته دوام ورکړ او په دې هېواد کې یې د واک د سوله ییز انتقال غوښتنه وکړه.
د عیني شاهدانو په وینا، دوی اعتراضیه سندرې ویلې او شعارونه یې لېږدول.
د سوډان پوځ د اپرېل په ۱۱مه نېټه د عمر البشیر د نږدې درېیو لسیزو د واکمنۍ له ختمولو وروسته واک ته ورسېد.
د اپوزیسیون ګوندونو او مدني فعالانو ترهغه وخته د اعتراضونو د دوام ژمنه کړې چې پوځي شورا یې غوښتنې ومني.
پوځي شورا چې جنرال عبدالفتاح البرهان یې مشري کوي، ویلي دي چې واک به په دوو کلونو کې ملکي حکومت ته وسپاري.
جنرال برهان پرون په یوه ټلویزیوني وینا کې وویل، پوځي شورا غواړي چې د معترضانو له مشرانو سره خبرې وکړي.
برهان چې خلکو ته یو نږدې سیاستوال ګڼل کېږي، د دفاع د پخواني وزیر عوض ابن عوف پرځای چې د بشیر له لېرې کېدو وروسته واکمن شو، وټاکل شو.
د سوډان پوځي شورا ویلي چې بشیر ښايي د جینوساید یا د قومي ډله ییزې وژنې او تصفیې په تور محاکمه شي.